1 июнь – “Халқаро болаларни ҳимоя қилиш куни” муносабати билан болажонларга қувонч улашилди. Ҳайрия тадбири
1 июнь – “Халқаро болаларни ҳимоя қилиш куни” бутун жаҳон болаларининг энг қувончли байрамларига айланган. Мазкур байрам дунё миқиёсида кенг нишонланиб, ҳар бир болажон ҳаётида шодлик ва бахтга тўла кун бўлиб қолади.Бугун байрамни муносиб равишда нишонлаш учун бир гуруҳ санъаткорлар Республика ихтисослашган эндокринология илмий амалий тиббиёт маркази қошидаги касалхонада катта ҳайрия байрам тадбирида иштирок этдилар. Мазкур касалхонада қандли диабет касаллиги билан оғриган болажонлар узоқ вақт даволаниб, меҳрибон шифокорлар ёрдамида дардига шифо топишмоқда.
Уюштирилган ҳайрия тадбири ташкилотчиларидан бўлган Отабек Маҳкамов болажонларни байрам билан табриклаб, хонандаларга навбат берди. Дастурни эстрадамизда ўз ўрнига эга хушовоз хонанда Руҳшона ўзининг шўх қўшиқлари билан бошлаб берди. Кетма-кет Ёқуббек Қудратов, Абдумалик Тотли, Али Отажонов, Ирода Дилроз, Анвар Собиров, Ўлмас Оллоберганов, “Сурҳон” ҳамда “Наво” вокал чолғу ансамбллари нафақат болажонлар, балки уларнинг оналари, шофокорлар-у, ҳамшираларга ҳам бир олам қувонч бағишлади. Байрамнинг якуний қисмида ёшларнинг севимли ижодкори Шаҳриёр реп йўналишидаги қўшиқлари билан барчани ҳушнуд этиб, ҳатто болаларни ўзи билан бирга куйлатиб рақсга чорлади. Хонандаларнинг куй-қўшиқларига ҳамоҳанг рақсга тушган болаларнинг диллари яйраб, юзларидан табассум аримади.
Файзли дастурхон ёзилиб, меҳмон бўлган болаларга ҳомийлар томонидан тақдим этилган совғалар, ўйинчоқлар ва беморлар учун зарур антисептик воситалар тақдим этилди.
Дунёдаги ҳар бир болажон соғ-саломат бўлиб, ота-оналари бахтига ҳамиша юзидан кулгу, қалбидан орзу-ният аримасин. Келажаги порлоқ бўлиб, Ватанимиз учун комил фарзандлар бўлиб етишишсин.
Бугунги ҳайрия байрамида иштирок этган барча хонандалар ва ҳомийларга ташкилотчилар ўз миннатдорчилигини билдиради.
Фотолар муаллифи Тимур Кабуловга ўз миннатдорчилигимизни билдирамиз