“Ёш авлодни маънавий олами ва уни юксалтиришда миллий эстрада санъатининг ўрни” мавзусидаги матбуот анжумани
“Ўзбекнаво” эстрада бирлашмаси томонидан 21 май куни миллий матбуот марказида “Ёш авлодни маънавий олами ва уни юксалтиришда миллий эстрада санъатининг ўрни” мавзусида матбуот анжумани ташкил этилди. Мазкур тадбирда Миллий эстрада санъатини ривожлантириш ва мувофиқлаштириш Кенгаши аъзолари, Бирлашма маъсул ходимлари, санъатшунос олимлар, таниқли хонандалар ва оммавий ахборот воситалари ходимлари қатнашишди.
Яхши биламизки, бугунги кунда ёш авлод эртанги кунимизнинг ҳал қилувчи кучи, мамлакатимизнинг таянчи ва суянчиғидир. Ана шу таянч қай даражада мустаҳкам бўлиши бугунги ёшларнинг маънавий оламига чамбарчас боғлиқ. Шунинг учун ёш авлодни маънавиятига таъсир этувчи ҳар қандай воситага жиддий эътибор қаратиш, керак бўлса, назоратга олиш жамоатчилигимизнинг муҳим ва устивор вазифаларидан бири сифатида белгиланган.
Жумладан, бугунги кун мусиқа санъати навқирон авлодимизнинг юксак маънавий руҳиятда камол топишида бошқа санъат турларига қараганда кўпроқ ва кучлироқ таъсир кўрсатмоқда. Бу масалада айниқса ёшлар қалбини ўзига ҳар томонлама жалб этадиган эстрада санъатининг аҳамияти беқиёсдир. Шундай экан, ёшлар онги ва қалбига кучли таъсир кўрсатаётган эстрада ижодкорлари, хонандалар янада маъсулиятли бўлиши, нафақат ижроси, балки ташқи кўриниши, хулқ-атвори, саҳнада ўзини тутиши, айтаётган қўшиғининг матни каби масалаларда ҳам жиддий аҳамият бериши зарур.
Саъаткорлар ҳамиша ўз устида ишлаб, ижро маҳорати билан бир қаторда билимларини ошириб, дунёқарашини кенгайтириб бориши керак. Бу борада китоб мутоааласи муҳимлигини инобатга олиб “Ўзбекнаво” эстрада бирлашмаси томонидан аксарият хонандалар Ўзбекистон миллий кутубхонасига аъзо қилинди. Шоир, бастакор, хонанда учлиги ҳамкорлиги асосида бирлашмага қарашли студияда Ватан, истиқлол, тинчлик каби мавзуларда юзлаб яхши қўшиқлар яратилди.
Анжуманда айни масалалар хусусида, ёшлар маънавиятига салбий таъсир кўрсатадиган қўшиқлар тарқалишини олдини олиш борасида нималар қилиш кераклиги ҳақида сўз юритилди.
Келгусида “Ўзбекнаво” эстрада бирлашмаси фаолиятида, санъаткорларнинг ижодий изланишларида анжуманда билдирилган таклифлар, эътирозлар албатта инобатга олинади. Ҳамманинг мақсади битта – келажагимиз эгаларини соғлом фикрли, маънавияти бутун авлод сифатида тарбиялашга сидқидилдан ҳисса қўшади.
Фотолар муаллифи Тимур Кабуловга ўз миннатдорчилигимизни билдирамиз