“Ўзбек маданияти кунлари” муносабати билан Туркиянинг Истанбул шаҳрида бўлиб ўтган концерт ҳақида батафсил
17 май куни Туркиянинг Истанбул шаҳрида “Ўзбек маданияти куни” муносабати билан “PROART CENTER OF PERFORMING ARTS” компанияси ҳамда унинг Истанбул шаҳридаги ваколатхонаси “PROART ISTANBUL” ва “O’ZBEGIM” миллий таомлари ресторани ҳамкорлигида катта концерт дастури бўлиб ўтди. Бу учрашув улкан кемада тўрт соат мобайнида давом этиб, унда ўзбек эстрадасининг ёрқин юлдузи Райҳон ҳамда жонли ижродаги хонишлари билан қалбларни ларзага келтирувчи хонанда санъаткор Жаҳонгир Отажонов ўзларининг дилтортар ва рақсга чорловчи тароналари ила туркиялик мухлисларини ҳушнуд этишди.
Концерт дастур режасига кўра, ўзбек миллий садолари остида бошланди. Хонанда Жаҳонгир Отажоновнинг хит тароналари томошабинларни ўзига жалб этиб, хоразмча куй қўшиқларга рақсга тушишди. Айниқса, “Оқ булутлар” таронасини мухлислар жўрликда ижро этишгани хонандани янада руҳлантирди.
Орадаги танаффусларда истеъдодли ва маҳоратли дизайнерлар Дилдора Қосимова, Бекзод Саидов ҳамда Ирода Ризаевалар ўз либослари намойишини тақдим этишди. Замонавий бичимдаги миллийлик билан уйғунлаштирилган, атлас ва адрас матоларидан тикилган бежирим либослар барчани ҳайратлантирди.
Эстрадамизнинг ёрқин юлдузи Райҳон куйлаганида эса меҳмонларнинг қувончи ичига сиғмай деярли барча қўшиқларини биргаликда жўр бўлиб куйлаб олқишлашди. Бетакрор овоз соҳибаси Райҳон кутилмаганда турк тилида қўшиқ ижро этгани томошабинларга янада хуш ёқди.
Концерт дастурларини бошловчилар Нилуфар Сотиболдиева ҳамда Доғукан Эрдем Кутлу очиб беришди. Мазкур концерт дастурида юртимиздан бир қатор санъат фидоийлари, шунингдек, “Ўзбекнаво” Эстрада бирлашмасидан Одил Абдуғаниевич ҳам дастур меҳмони бўлди. Қолаверса, тадбир сўнгида Dj Akrom ўзининг “Eastern disco” деб номланган кичик дастурини ҳам тақдим этди.
Бир сўз билан айтганда, мазкур дўстона учрашув улкан кемада, ўзбек эстрадасининг ёрқин ижодкорлари, дизайнерлари, миллий таомлари тортилган дастурхон ҳамда мовий осмон-у, денгиз билан уйғунлашиб, кўпчиликнинг хотирасида узоқ вақт сақланиб қоладиган бўлди, десак муболаға бўлмайди.
