Тиббиёт фанлари доктори, профессор Dr Voice иштирокида матбуот анжумани бўлиб ўтди
Айни кунда Ўзбекистонда Туркиядан ташриф буюрган бир гурух ўз ишининг усталари, профессионал врач-профессорлар меҳмон бўлишмоқда. Dr Voice номи билан машҳур бўлган Исмаил Кочак бугун ''Ўзбегим таронаси'' радиосида меҳмон бўлгач, у ҳақда янада тўлиқроқ маълумотга эга бўлдик. Самимий табассум билан ўзини таништирган Dr Voice бошловчилар Турсуной Алимова ҳамда Раъно Алимоваларнинг саволларига жавоб қайтараркан, энг аввало у ўзбек тилини таржимонсиз тушунганига аҳамият бердик.
Маълум бўлишича, асосан, санъаткорлар, актёрлар, нотиқлар, дикторлар ва ўқитувчилар билан ишлаб, уларнинг овоз пайларини текшириб, бирор камчилик бўлса ёрдамини аямайдиган бу профессор ўз соҳасида мисли кўрилмаган ютуқларга эришган.
Тиббиёт фанлари доктори, профессор Исмаил Кочак Туркиянинг Истамбул шаҳрида жойлашган шаҳсий клиникасида юртининг энг машҳур юлдузлари, актёр ва актрисаларини қабул қилиб, уларни ҳар бир концерт олдидан кўрикдан ўтказади ва овозларини созлайди. Ҳаттоки фильм ёки сериалларда роль ижро этадиган актёрларни образи устида ишлаб улар учун қандай овоз аҳамиятли эканини билиб, овозни созлашда ёрдам беради.
Улардан ташқари Исмаил Кочак бугунги кунга қадар унга мурожаат этган бир қанча инсонларнинг овозини жарроҳлик йўли билан ўзи истаганича ўзгартириб ижобий ютуқларга эришган. Хаттоки, бир муъжизавий воқеани сўзлаб берганида ниҳоятда ҳайратландик. Бир ой аввал, ўн туққиз йил гапирмаган йигитни операция қилиб уни илк бор сўзлатган. Онаси эса бу мўжизадан ҳайратга тушиб фарзандининг овозини эшитганида кўзларидан севинч ёшлари тинмаганини, бу эса бир инсон тақдирини ўзгартириб юборганини фаҳр билан сўзлаб берди. ''Овозни тор каби созлаш мумкин, фақат ҳар бир овоз ўз соҳибига ҳос бўлиши лозим. Бунда нафақат овозни ўзгартирамиз, балки мижозни психологик томонлама ҳам тайёрлаймиз. Сабаби, инсон бундай ўзгаришга руҳан тайёр бўлиши керак'',- дейди Исмаил Кочак.
''Ўзбегим таронаси'' радиосида бўлиб ўтган суҳбатдан сўнг профессор “Dedeman” меҳмонхонасига йўл олди. У ерда Dr Voice билан бирга туркиялик пластик жаррох, Отоларинголог ва ўзбекистонлик кўз шифокори иштирок этиб, хонандалар ва журналистлар билан матбуот анжумани бўлиб ўтди.
Райҳон, Саида, Шаҳруз, Малика Эгамбердиева, ''Шарқ'' ансамбли солисти Сарвар ва яна бир қатор хонандалар Dr Voice ва бошқа шифокорларнинг ўз фаолиятлари ҳақида сўзлаган нутқига қулоқ тутишди. Иштирокчилар томонидан йўлланган саволларга Исмаил Кочак яъни Dr Voice жавоб бераркан, унга мурожаат этган ҳар бир инсон ўз овози билан кўп ютуқларга эришиши мумкинлигини айтиб ўтди. ''Ҳар ким қўшиқ куйлай олади, фақат овозни туғри қўя олиш керак'', дейди врач. Унинг бугунга қадар амалга оширган ишларини мўъжизага тенглаштириш мумкин.
Ҳар бир сўзлаган нутқи билан санъат аҳлини қизиқишларига сабаб бўлган тиббиёт фанлари доктори, профессор Dr Voice энди ўзбек хонандалари овозига ҳам ўзгартиришлар киритса ажабмас.
Фотолар муаллифи Тимур Кабуловга ўз миннатдорчилигимизни билдирамиз