Ўзбекистонда хизмат кўрсатган артист Рашид Ҳолиқовдан тез кунда янги видеомаҳсулот

Эстрадамизда ўзининг бетакрор қўшиқлари билан муносиб ўрин олган, йигирма йилдан ортиқ вақт ўтса-да, гуруҳлар орасида ҳали-ҳамон ўзининг мустаҳкам ўрнига эга “Шаҳзод” гуруҳи доим янги тароналар яратиш билан банд. Гуруҳнинг ҳар бир яратган қўшиқлари оз фурсатда мухлислар қалбидан чуқур жой олади ва севимли тароналар қаторига қўшилади. Бир ой аввал “Шаҳзод” гуруҳи яккахони Рашид Ҳолиқов билан боғланганимизда янги тарона учун тез кунда видеоклип суратга олиш ишлари бошланади, дея маълумот бергандилар.

 

  

 

Аммо, тайёргарлик ишлари билан боғлиқ муаммолар туфайли тасвирга олиш ишлари бироз ортга сурилди. Вақти соати етиб, видеоклип суратга олинди ва айни кунларда монтаж ишлари олиб борилмоқда.

 

 

 

Француз тилидаги “Voyage” номли қўшиқни композитор Шуҳрат Зокиров қайта сайқаллаб, ўзгача руҳда тайёрлаган. Рашид Ҳолиқов ижросида сокин йўналишда тараннум этилган мазкур тарона учун ноанъанавий усулда видеомаҳсулот суратга олинди. Клипмейкер Ёдгор Носиров режиссёрлигида яратилган видеоклип учун катта павильонда махсус декорация қурилди.

 

 

 

Бугун ана шу клипнинг тасвирга олиш жараёнларидан фоторепортаж тақдим этамиз, тез кунда эса премьера намойишини ўтказиб юборманг.