Ғубор оралаган қалбларга ҳурсандчилик бағишлаш истагида ҳайрли ишга қўл урилди
Халкимизнинг меҳри дарё ва қалби пок, шунинг учун ҳам турли байрам ва тадбирларда кексаларни йўқлаш, беморларни ҳолидан хабар олиш азалий қадриятларимиздан бири бўлиб, қон-қонимизга сингиб кетган. Ана шу анъанани бугунги кунда ҳам давом эттириш мақсадида бир гурух жамоа бўлиб ҳайрли ишга қўл урилди.
Пойтахтимизда жойлашган гемотология институти қошидаги касалхонада даволанаётган болажонларга шодлик улашиш ниятида эрта тонгдан кўнгиллилар йиғилиб, совғалар тўпланди.
Кўп ўтмай касалхонага ташриф буюриб бўлим бошлиғи Наргиза Нусратуллаева билан юзлашдик. Тадбирга бир қанча инсонлар ташриф буюришган бўлса-да, беморлар хонасига тўрт кишига рухсат берилди. Ички тартиб қоидага итоат этган ҳолда, юзимизга ниқоб тақиб ичкарига кирдик. Мазкур тадбир ташкилотчиларидан бири, чет тилларига ихтисослаштирилган ўқув маркази раҳбари Шаҳноза Шарипова, актёр ва юрист Отабек Маҳкамов, хонанда Абдумалик Тотли ҳамда сайтимиз ҳодими томонидан келтирилган бир қатор совғалар, жумладан, китоблар, футболкалар ва ширинликлар бўлимдаги барча бемор болажонларга топширилди.
Меҳмонларни қарши олган болажонлар турли совғалардан қувонишгани, юзларида табассум балқигани, қолаверса уларнинг кўзидаги учқунни кўриб ич-ичимиздан севиндик. Фарзандлари дардига даво истаб нажот билан боқаётган онажонларга умид ва ишонч барча дардни енгувчи куч эканини таъкидлаб, сабр ва соғлик тиладик.
Бу тадбир бирор байрам муносабати билан эмас, шунчаки озгина ғубор оралаган қалбларга ҳурсандчилик бағишлаш ва ҳаёт давом этаркан, дардга даво топишга умид сўнмаслиги зурур эканини ҳис этишларини истаб ташкил этилди.
Келгусида бундай акцияларни тез-тез ўтказиб боришни олдимизга мақсад қилдик. Навбатдаги тадбиримиз 19 март куни бўлиб ўтиши режалаштирилди. Барча санъаткорларни ва ҳайрияга бефарқ бўлмаган саҳоватли инсонларни чорлаймиз. Зеро, атрофимиздаги кўмакка эҳтиёжмандларга ёрдам бериш ҳар биримизнинг инсоний бурчимиздир.
