Шаҳзоданинг 15 йиллик юбилей катта концерт шоу дастури тафсилотлари
Бугун эстрамизнинг энг ёрқин ва мафтункор хонандаси Шаҳзоданинг 15 йиллик юбилей катта концерт дастурига старт берилди. Баҳор фаслининг гўзал палласида Шаҳзода ўз мухлисларини муҳташам “Истиқлол” санъат саройига жамлади, ташриф буюрган хонанданинг асл мухлислари мисли кўрилмаган даражадаги катта шоу дастурининг меҳмони бўлдилар. Қалбларда ҳис ҳаяжон, гўзал орзулар, яхши ниятлар ва самимий табассум билан саҳнада бугуннинг маликаси Шаҳзода пайдо бўлганида табиийки ундаги хис хаяжон, туйғулар залда ўтирган ҳар бир ашаддий мухлиснинг қалбида ҳам туғён қиларди. Концерт қандай бўларкин?..
Концерт дастурини томоша қилиб бир олам таассуротлар билан, узоқ кутилган бу шоу кутилгандан ҳам қизиқарли ва жуда файзли ўтди дея оламиз. “Ижодимга 15 йил” дея номланган шоу дастур Шаҳзоданинг шу вақт мобайнидаги ижодий изланишлари, яратган ижод маҳсуллари ва албатта санъат оламидаги ютуқларининг яна бир бора исботи сифатида намоён қилди. Зал тўла аншлаг, саҳнада катта ва бир нечта кичик мониторлар, улар билан уйғунлашган ёрқин чироқлар, хонанданинг ҳар бир қўшиғига мос равишда декорация реквизитларини ўзгариб туриши саҳнага ажойиб кўрк бағишлади.
Шаҳзода эстрадамизнинг ёрқин намоёндаси Шоҳруҳхон билан “Унутолмадим” дуэтини куйлаганида бутун зал уларга жўр бўлган бўлса, “Божалар” гурухи Жаҳонгир Позилжонов билан тақдим этган дуэтлари томошабинни рақсга чорлаб, юзига табассум, қалбига қувонч улашди.
Улуғбек Раҳматуллаев билан айтилган дуэт тарона эса барча учун янгилик бўлди. Истеъдодли хонанда Жасур Ғоипов билан биргаликда куйланган, барчага таниш хит бўлган дуэт залга янада жон бағишлади. Умуман хонанданинг ҳар бир чиқиши кутилмаган сюрпризларга бой бўлди десак адашмаймиз.
Томошабин учун севимли ва қадрли бўлган “Ҳаёт айт” таронаси ҳеч кимнинг ҳаёлига ҳам келмаган, истеъдодли актёр Улуғбек Қодиров ва Гули Эшонқулова жўрлигида тақдим этилди. Бир қанча янги тароналар, шулар қаторида тингловчиларнинг қалбидан жой эгаллаган, хит даражасига кўтарилган қўшиқлар мухлисларни қувонтирди.
“Chicco” ва Chiccita” тароналари янграганида беғубор болажонлар иштирокидаги саҳна кўрниши ҳаммага завқ бағишлади. Ҳар бир қўшиқ учун саҳналаштирилган рақслар, танланган либослар, саҳна декорациялари, хонанданинг саҳнада ўзини эркин тутиши ҳаммасига тасанно айтиш мумкин.
Юбилей концертнинг энг ёрқин, эсда қоларли томонларидан яна бири ҳар бир блок орасидаги ўқилган ҳаётий монологлар бўлди. Уларни тинглар эканмиз гўёки севимли хонандамиз бутун ҳаёти ва ижод йўлидаги турли ҳил тўсиқлардан қандай ўтгани ва уларни қандай енггани ҳақида гапираётгандай эди.
“Баҳт нимага керак инсонга агар кўнгилда орзу бўлмаса...” мана шу сатрлар мени ўйлантириб қўйди. Ҳақиқатдан ҳам... Хонанда ўз мухлисларига бугун нафақат чиройли дастур туҳфа қилди балки уларнинг ҳаётга бўлган қарашларини ҳам ўзгартирган бўлса ажабмас.
Ҳар бир ўқилаётган монолог сўнггида “Мен бахтлиманми?” деган ёзув пайдо бўлиши кўпчиликнинг эътиборини тортган бўлса керак. Бу саволнинг жавоби концерт дастурининг сўнггида аён бўлди. “Мен бахтлиман” дея ўзининг қувончи, орзулари, уларнинг руёби, ҳақиқий бахтини кўрсатиб бера олган, томошабинга қувонч, ҳақиқий шодликни, байрамни улаша олган мафтункор хонандамиз Шаҳзодага раҳмат айтамиз. Юбилей концерт дастурининг навбатдаги кунларига куч қувват ва омад тилаймиз.
Фотолар муаллифи Тимур Кабуловга ўз миннатдорчилигимизни билдирамиз